BAKA BUKAS- PAGSUSURI NG PELIKULA

 

1. Pamagat ng Pelikula:

Baka Bukas

(Maybe Tomorrow)

(2016)

2. Direktor:                      Samantha Lee

3. Sumulat ng Iskrip :   Samantha Lee

4. Paksang Awit:           We Were Never Really Just Friends

5. Kompositor:              Denise Santos

6. Mang-aawit:               Denise Santos

7. Buod ng Pelikula:

       Si Alex ay isang 23 taong gulang na manunulat, direktor, photographer, production designer, social media manager at alam ng kanyang pamilya at mga kaibigan na siya ay tomboy maliban sa kanyang pinakamatalik na kaibigan  na si Jess. Si Jess ay isa nang aktres kung kay’t malimit na lamang magkita ang dalawa. Kung kaya’t madalas ang kasama ni Alex ay si Julo, isang artist, ang photographer na si David at model na si Kate, ang mga ito’y miyembro ng LGBTQ.

             

            Isang umaga, pilit ginigising ni Jess si Alex upang ipaalam na wala na sila ng boyfriend nito. Binalewala naman ni Alex ang pagdaramdam ng kaibigan sapagkat sanay na ito sa ganoong senaryo. Doon lamang muling nagkausap ang dalawa. Nagtungo si Alex sa bahay ni Kate, ang ex-girlfriend nito subalit nanatili silang magkaibigan, upang kunin ang mga naiwang gamit niya roon. Inanyayahan ni Alex si Kate namagtungo sa bar kung saan sila madalas magkakaibigan. Sinama rin ni Alex si Jess sa bar na iyon upang ipakilala sa mga kaiibigan. Habang nasa daan, naikwento ni Alex sa kaibigan na matagal ng may gusto si Julo sa kaibigang si David. Natahimik lang ito nang sabihin ni Jess na ang weird magkagusto sa bestfriend. Pagpasok sa bar, kung saan naroon na rin  si Julo at David, halatang tutok na tutok sa cellphone si Alex kung kaya’t di naging komportable si Jess. Nang biglang umalis si Alex, agad namang inasar at hiniya ni Julo si Jess na naging dahilan upang sundan si Alex sa labas. Doo’y nadatnan niyang may kausap si Alex, babae. Nagulat at uutal-utal na sumagot si Alex kay Jess upang ipakilala si Kate bilang kaibigan. Agad rin namang umalis si Kate na ikinabigla ni Jess. Habang nasa daan pauwi ang dalawa, paulit-ulit na tumatawag si Kate kay Alex. Nang di makatiis si Jess, sinagot nito at nalaman niya ang pinakatatagong sekreto ng matalik na kaibigan. Walang magawa si Alex kundi umamin na siya nga ay tomboy at ex-girlfriend niya si Kate. Ikinagulat ni Jess ang nalaman. Noong gabi ring iyo’y humingi ng pabor si Jess na makitulog kina Alex. Di naman tumanggi ang kaibigan. Noo’y nangako ang isa’t isa na walang magbabago sa kanilang dalawa. 

        Isang gabi habang kumakain si Kate at Alex, nasabi ni Alex na alam na ni Jess ang sexual orientation nito na siya namang ikinagulat ni Kate. Ang buong akala niya’y itinago nila ang kanilang relasyon sapagkat hindi pa alam ng magulag ni Alex ang sekswalidad nito. Iyon pala’y mali. Si Jess, ang bestfriend ni Alex, ang dahilan kung bakit sila nagtago. Natahimik ang dalawa. Pinayuhan ni Kate si Alex na hangga’t maaga pa’y sabihin na nitong may gusto siya kay Jess subalit mariing tumanggi si Alex sapagkat ayaw niyang masira kung ano man ang mayroon sa pagitan nilang dalawa ni Jess.

     Sa mga sumunod na gabi, muling nagtungo sina Alex at Jess sa bar kasama sina Julo at David. Napansin ni Julo na pareho ang porma ni Jess kay Alex na hindi tulad noong una silang nagkita. Nang makainom na ang mga ito, nakita ni Jess na nakikipaghalikan si Alex sa isang lalaki na siya namang ikinainis niya. Dinagdagan pa ni Julo ang inis nito nang sabihing matagal nang may gusto si Alex sa kaniya. Agad umalis si Jess pagkatapos masampal si Julo dahil sa narinig. Hinabol ni Alex ang kaibigan subalit pinigilan siya nito. Nang malaman ni Jess na hindi siya masusundo ng kanyang driver, nakiusap ito kay Alex, na kanina lamang ay kinaiinisan nito, na sasabay na lamang ito pauwi. Simula noo’y nagkaroon ng mas malalim na uganayan ang dalawaa higit pa sa pagiging “bestfriend”. Simula noo’y tila na-engganyo si Jess sa posibleng mangyari sa kanilang dalawa. 

       Palagi silang magkasama. Hinihintay ni Alex sa labas ng set si Jess pagkatapos magshooting. Ihahatid sa bahay. Naging masaya silang dalawa sa kung ano man ang namamagitan sa kanila. Nalaman ng manager ni Jess ang sitwasyon nilang dalawa ni Alex. Pinagsabihan nito na hanggang maaari’y itago sapagkat nasa rurok na siya ng kasikatan. Isang araw bago magsimula ang shooting, naroon si Alex sa set, naiwan ito habang nagpapalit ng suot si Jess, nang lumapit ang manager ni Jess upang sabihing maaari na itong umalis sapagkat nakakaistorbo ito sa aktres. Naging masikip at magulo ang pakiramdam ni Alex. Naging agresibo si Jess. Nagiging malabo ang dating masayang umpisa. Hanggang sa isang araw, kumalat ang larawan nilang dalawa at ang namamagitan sa kanila. Agad na nagtungo si Jess sa bahay nina Alex upang ipamalita ito. Upang sabihing gagawin niya ang lahat maitago lamang ang relasyon nila. Doo’y pinigilan ito ni Alex. Nagtapat ito na pagod na siya. Na para bang ikinulong uli siya. Na kailangang pumili ni Jess kung ano ang priority niya. Pinili ni Jess ang career niya, ayon na rin sa payo ni Alex. Sa huli, napagdesisyunan ng dalawa, na tapusin na nila ang relasyon nila. Araw-araw nang nagkukulong si Alex sa silid nito. Umaasa na baka bukas, maging okay na siya. Umaasa na baka bukas, makuha na niya ang mga bagay na gusto niya. Na baka bukas, kaya na niya muling magmahal nang di na itinatago pa. 

8. Mga Tauhan

• Alex (Jasmine Curtis-Smith) - matalik na kaibigan ni Jess; tomboy; Natakot umamin sa kaibigan sapagkat ayaw niya itong mawala sa kanya at masira kung ano man ang meron sa kanila subalit hindi niya namalayang nangyari na pala ang kinatatakutan niya. 

• Jess ( Louise delos Reyes) - ang matalik na kaibigan ni Alex; aktres; nadala sa nalamang may gusto ang kaibigan nito sa kanya at naguluhan kung ano talaga ang sekswalidad niya; pinili ang career ayon na rin sa nais ng kaibigan. 

• Kate (Kate Alejandro) - kaibigan nina Julo at David; modelo; ex-girlfriend ni Alex; naging tagapayo, karamay ni Alex nang maguluhan at mapagod sa relasyon nila ni Jess. 

• Julo ( Gio Gahol) - stylist; kaibigan ni Alex; matagal nang may lihim na pagtingin sa kaibigan nitong si David na sa huli’y naging sila rin; siya ang nagsabi kay Jess ang lihim na pagtingin ni Alex para dito; hindi naging maganda ang impresyon kay Jess sapagkat sa pagkakaalam na ‘straight’ ito; kalauna’y naging stylist ni Jess.

• David (Nel Gomez) - kapwa photographer ni Alex; palaging kabangayan ni Alex pagdating sa mga karelasyon; manhid;  naging kasintahan ni Julo sa huli.

• Manager ni Jess ( Lexter Tarrela) - nagpayo kay Jess na maging maingat lalong-lalo na sa relasyon nila ni Alex; nagpaalis kay Alex nang minsang magtungo sa set ng shooting at nagsabing ito’y nagiging istorbo at distraction lamang kay Jess.

• Mommy ni Alex (Cheska Inigo) 

9. Tagpuan:            Bahay; Bar; Shooting Set

10. Paksang-Diwa:     “Walang pinipiling kasarian ang pag-ibig.”

11. Istilo at Pagkamasining

         Napakagaling ng manunulat ng iskrip. Simple subalit makatotohanan. Magaling ang pagkakalahad  ayon sa nais palabasin ng may akda. Gumamit rin ito ng flashback o pagbabalik-tanaw na mas lalong nagpatingkad sa pelikula at nagpanatili ng interest ng manunuod.. Mararamdam mo ang mga emosyon na dapat mong maramdaman sa pamamagitan ng mga linya ng mga karakter. Halo-halong emosyon ang mararamdaman mo sa mga salitang binibitawan pa lang ng mga karakter. Maiinis, magagalit, maiiyak, madudurog ka sa bawat palitan ng linya nila. May pagkakataon ring mananahimik ka dahil sa husay ng pagpapalitan ng salita. Hindi na ginulo o mas pinanatili niya itong simple mula umpisa hanggang dulo, tulad ng nais ng awtor. Mas madaling maunawaan ang nilalaman ng pelikula sapagkat ito’y may simpleng banghay, simpleng nagsipagganap, simpleng aral at simpleng nilalaman subalit mahusay na paggamit ng wasto at tumpak na salita

            Napakahusay rin ng istilo ng pagdidirehe. Sabi nila, malaki ang papel ng direktor sa pagrerebisa ng iskrip. Ang pagkabuo ng pelikula ay hindi dahil sa kagustuhan ng direktor na makapaglikha ng malaking pelikula bagkus upang makapagkwento ng isang istorya. Ang paraan ng pagdidirehe ay napakahusay at napakalinis. Napaka-swabe ng timpla ng pelikulang ito. Mula sa produksyon hanggang sa pinakamaliit na tao sa pelikulang ito. Wala akong aktuwal na kaalaman sa galaw ng kamera, pero ultimo’y yung pokus at paglalayo ng kamera sa mga artista’y maayos na nailahad at nabigyang-diin. Hindi ito tipikal na love story na kung saan may kontrabida na magiging sagabal sa pagmamahalan ng dalawa. Ito’y simpleng love story na may bagong timpla, may bagong pait. 

12. Pagpapahalaga ayon sa Nilalaman

1. Kahalagahang Sosyal at Pangkabuhayan

• Ang mga pangunahing tauhan ay nasa mataas na antas. May mataas na trabaho at nakapag-aral sa magandang paaralan. Naibibigay sa sarili ang luho at ibang kagustuhan.

2. Kulturang Filipino

• Pagkakaroon ng kasiyahan sa tuwing may kaarawan.

Kadalasan ang bawat pamilyang Pilipino ay gumagawa ng paraan kung paano maipagdiriwang ang kaarawan ng isang tao. Lumustay man ng malaki. Tulad na lamang ni Julo, na ipinagdiriwang ang kaarawan sa bar.

• Labis na pagmamahal ng magulang sa anak.

Hindi natin maitatanggi ang pagiging malapit natin sa ating mga magulang. Kung paanong ang mga magulang ay handang umintindi at tanggapin ang anak, ano man ang kanyang kasarian at pagkatao. Tulad ni ina ni Alex na bagama’t nalamang tomboy ito, hindi ito itinakwil bagkus ay sinuportahan pa niya ang anak at dinamayan sa panahong sawi ito sa pag-ibig.

3. Simbolismong Filipino

• ALEX - Siya ang pinakapangunahing tauhan sa akda. Isa siyang representasyon ng mga kabataan ngayon. Siya ay representasyon ng isang taong handang magsakripisyo para sa taong minamahal. Siya ay representasyon na tayo ay may kakayahang pumili at maging masaya sa landas na pinili. 

• JESS- Isang aktres, tulad ni Alex, isa rin siya sa mga pangunahing tauhan. Siya’y sumisimbolo ng pagiging career-oriented nating mga Pilipino, na handang isakripisyo ang taong pinakamamahal para lamang marating at alagaan ang tinatamasang karangyaan at katanyagan sa larangang kinaroroonan.

4. Kahalagahang Pangkatauhan

• “Just because everyone here is ordering bagnet, it doesn’t mean I have to order it too. I want my tapa. That’s just what I want.” - Alex

•   Ang bawat isa sa atin ay may kalayaang pumili kung ano ang gusto. Malaya ang bawat isa na pumili ng taong mamahalin, karerang tatahakin, o maging ang kasarian nito. Matutong huwag sumabay sa uso, o kung ano ang kinagisnan ng tao. Upang lumaya, marapat na usisain ang nilalaman ng puso at sundin ang dinidikta nito at hindi ang ibang tao. 

• “One of the scariest thing about coming out is finding out  if the one you love are still around. She’s the one I could not risk losing.” - Alex

• Lahat tayo ay mag kakayang magmahal, subalit karamihan sa ati’y takot masaktan. Lalo na kung ang taong mahal natin ay ang taong pinakamalapit sa atin. Marami ang pinipiling maging kaibigan na lang kaysa makarelasyon dahil sa takot na baka sila’y masira at mawala ng parang bula ang kanilang pagsasama.

• “But sometimes people don’t deserve to know because they’ll just ruin it.” -David

• Hindi lahat ng bagay, kailangan mong sabihin sa iba. Dahil madalas sila pa ang sisira kahit inakala mo pang kaibigan mo sila. Huwag magtiwala sa kani-kanino. Matutong piliin ang sasabihin sa ibang tao.

•  “I knew it was gonna be like this, but I don’t know it was gonna feel like this.” - Alex

• Hindi mo malalaman, mararamdaman, matutunan kung hindi mo ito naranasan kahit na minsan. May mga bagay na akala nating alam na natin pero hindi natin alam na may mga detalye pa pala roon na hindi natin nabatid. Hindi lahat na naranasan mo sa una, ganoon rin ang mararanasan mo sa pangalawa.

• “Alam mo, sabihin mo sa sarili mo, “it’s okay”.”- Workmate ni Jess

• Lahat na napanghihinaan ng loob, nasasaktan, naguguluhan, nagkakamali pero bahagi iyon ng buhay. Ang kailangan lamang nating gawin ay kumbinsihin natin ang ating sarili na okay lang iyon. Kaakibat ng pagiging tao ang pagkakamali, gayon din ang pag-ibig sa kasakitan.

• “There’s always something missing. We always want something more.” - Alex

• Isang katangian ng isang tao ay ang pagiging di kuntento. Palaging may bagong gusto. Hindi tayo nakukuntento. At kahi kailan, hindi tayo magiging. Marapat lamang na tayo’y may priority upang maiwasan ang kalituhan sa kung ano ang kailangan sa gusto lang.

13. Pangkalahatang Puna at Mungkahi

   Mahusay ang pagkakabuo sa pelikula, mula sa pagkasulat ng iskrip hanggang sa pagdidirehe at pag-ieedit. Swak na swak ito sa panlasa ng millenials. Subalit sa ilang bahagi’y nakulangan ako sapagkat masyadong nakasentro kay Alex ang istorya kung kaya’t di na nabigyang hustisya ang iba pang karakter. Hindi masyadong ipinakita ang point-of-view ni Jess. Hindi ipinakita kung paano naging magbestfriend and dalawa na dahilan kung bakit ayaw niyang mawala. Hindi rin natalakay o nabigyang-pansin kung papaano umamin si Alex sa kanyang pamilya’t mga kaibigan. Maraming mga bagay na sana’y ipinakita o pinasadahan lamang ng direktor upang maging mas buo at pulido ang mensahe ng palabas. Sa kabilang dako, masasabi kong naging daan ito upang mas maging bukas ang mga tao sa LGBTQ. Hindi tinakpan o natakot ang direktor sa sasabihin ng iba tulad ng kawalang respeto o ang pagiging reserved ng kababaihan, humanga ako sa angking lakas ng loob ng manunulat at direktor na maging boses ng nakararami at kabilang sa komunidad ng LGBT. 

Sinuri ni:

Binibining Diane